ДУИ смета дека победникот на изборите во албанскиот политички кампус треба да биде единствениот избор за коалиција во власта на победничката партија на Македонците.
Вилијамс е ангажиран да подготви платформа за легитимитетот, зашто ВМРО-ДПМНЕ „или не го прочитала или Рамковниот договор го чита по свое“, изјави викендов Али Ахмети, лидерот на ДУИ кој најави дека од септември ќе почне спроведувањето на нивната стратегија. А таа подразбира и орагнизирање протести пред Собрание, пред Владата и пред други институции, активирање на предлог-законот за ветинг…
На собирот на сите партиски структури викендов во Гостивар, Ахмети кажа дека тие не се откажуваат од тоа дека легитимно е нивното барање да бидат дел од власта и дека за тоа ќе водат битка во секоја населба и институција. За нивното неучество во власта, Ахмети вели дека е кражба на легитимитетот.
Вилијамс е професор по право и меѓународни односи на американскиот универзитет во Вашингтон. Во биографијата на Википедија е запишано дека Вилијамс им помогнал на дваесетина држави и субјекти во големи меѓународни преговори за мир, изготвување на законодавство и планирање политики. Како што се наведува, тој учествувал како претставник во преговорите за Дејтонскиот договор (Босна и Херцеговина), Договорот од Рамбуе и преговорите во Париз (Косово), преговорите за Охридскиот договор (Македонија) и преговорите Подгорица – Белград. Исто така, се посочува дека Вилијамс советувал десетина влади и партии во Африка, Азија и Европа.
