Извештајот, објавен на веб страницата на Јавното претпријатие за државни патишта (ЈПДП покажува активности на изведувачот за експропријација, геотехнички истражувања и други претходни активности и спецификации за предвидените автопатски делници Тетово-Гостивар-Букојчани и Требеништа – Струга-Ќафасан на Коридор 8 и Прилеп-Битола на Коридор 10 Д.
Исто така, во Извештајот се прикажани и финансиските трансакции помеѓу Министерството за транспорт и врски и Јавното претпријатие за државните патишта во рамките на Програмата за финансирање на патната инфраструктура, односно исплатите што завршуваат кај изведувачот на работите, конзцорциумот Бехтел и Енка.
Во ноември 2023 била реализирана една трансакција во износ од 223.596.680 денари. Во декември истата година пак, имало исплати во четири наврати. На 5 декември се исплатени 245.606.294 денари, на 28 декември две исплати од 669.225.176, односно 261.862.793 денари, а на крајот на 2023 година, на 29 декември 1.695.871.044 денари.
Со Програмата за финансирање на патната инфраструктура за овој проект лани беа предвидени 15 милијарди денари, а за годинава за таа намена во буџетот на Министерството за транспорт и врски има 15,1 милијарда денари.
Договорот со изведувачот американско-турскиот конзорциум Бехтел и Енка беше потпишан во март минатата година кој сѐ уште го пратат бројни контроверзи.
Жители од селата Горна и Долна Бањица неколку пати го блокираа регионалниот пат кој минува низ нивните села и не ги пропуштаа вработените во компанијата Бехтел и Енка кои работат на трасата на Коридор 8 да дојдат до своите работни места. Блокадата на патот беа во знак на револт од начинот на кој се спроведува експропријацијата на земјиштата во овие две села.
