Украинскиот министер за надворешни работи денеска за време на посетата на Кина рече дека е важно Киев и Пекинг – близок сојузник на Москва – директно да зборуваат за ставање крај на војната во Украина.
„Разговорите штотуку завршија. Тие траеја вкупно повеќе од три часа, подолго од планираното. Ова беше многу длабок и конкретен разговор“, рекол украински извор во делегацијата за Ројтерс.
Кулеба во првичните забелешки на средбата рече дека очекува „темелни и суштински разговори за билатералните односи, меѓународната агенда и што е најважно, патот кон мирот“.
„Убеден сум дека праведниот мир во Украина е меѓу стратегиските интереси на Кина, а улогата на Кина како глобална сила за мир е важна.“
Кина се претставува како неутрална страна во војната и вели дека не испраќа смртоносна помош на ниту една страна, за разлика од САД и другите западни земји, вели АПФ.
Но нејзиното продлабочено партнерство „без ограничувања“ со Москва ги натера членките на НАТО да ја наречат „несомнен поттикнувач“ на војната што Пекинг никогаш не ја осуди.
„Многу е важно Киев и Пекинг да се вклучат во директен дијалог и размена на ставови“, рече Дмитро Кулеба во видеото објавено на социјалните мрежи по пристигнувањето во Пекинг.
Тој рече дека ќе одржи „обемни, детални, суштински разговори“ со кинескиот колега Ванг Ји за постигнување „праведен мир“.
Кулеба рече дека неговата посета до петок е првата од кој било висок украински функционер откако Русија ја нападна Украина во февруари 2022 година.
Пекинг денеска соопшти дека разговорите ќе се фокусираат на билатералните врски и „други прашања од заеднички интерес“.
„Во врска со украинската криза, Кина секогаш верува дека раниот прекин на огнот и политичкото решение им служат на заедничките интереси на сите страни“, рече портпаролката на Министерството за надворешни работи Мао Нинг.
„Кина ќе продолжи да стои на страната на мирот и дијалогот“, рече таа.
Кина се претставува како посредник во војната, испраќајќи го пратеникот Ли Хуи во Европа на повеќе рунди „шатл-дипломатија“, вели АПФ.
Претседателот Си Џинпинг овој месец му рече на унгарскиот премиер Виктор Орбан дека светските сили треба да им помогнат на Русија и Украина да ги обноват директните преговори. Посетата на Орбан на Пекинг беше означена како „мировна мисија“.
„Мораме да избегнеме трка меѓу мировните планови“, рече Кулеба во својата порака од вторникот, додавајќи дека Кина „треба да гледа на односите со нашата земја низ призмата на своите стратегиски односи со Европа“.
