Заедницата е почеток на она што би можело да следи, пишува Би-би-си. Новинарска екипа на Би-би-си отишла во селото каде што се случи масакрот за време на викендот.
До утрото во средата сѐ уште траеја борбите во заедницата, една од израелските заедници долж границата со Газа. Затоа дури подоцна ги собираат телата на неговите израелски жители кои беа убиени кога Хамас ја проби граничната ограда од Газа во саботата рано наутро.
Војниците кои поголемиот дел од денот го поминаа во урнатините извлекувајќи ги телата на цивилите изјавија дека се случил масакр. Се чини веројатно дека повеќето од убиствата се случиле во раните утрински часови на нападот во саботата.
„На израелската армија, фатена неспремна, ѝ беа потребни 12 часа да стигне до заедницата“, изјави за Би-би-си Давиди Бен Зион, заменик командант на Единицата 71, искусен тим од падобранци кои го предводеа нападот.
„Фала му на Бога што спасивме многу животи на многу родители и деца“, рече тој. „За жал, некои беа запалени со молотови коктели. Тие се многу агресивни, како животни“, додаде Бен Зион.
Бен Зион рече дека вооружените лица на Хамас кои убиваа семејства, вклучително и бебиња, се „џихад-машина за убивање невооружени цивили. Тие беа нормални граѓани кои сакаа да го јадат својот појадок и тоа е сѐ“, рече тој. Тој додаде дека некои од жртвите биле обезглавени.
„Ги убиле и им ги отсекле главите, тоа е ужасно да се види… Мора да се потсетиме кој е непријателот и која е нашата мисија… Ние сме за вистината и за вистинската страна, светот треба да биде со нас“, рече Бен Зион.
Друг офицер покажа на крвава виолетова вреќа за спиење. Отечен ножен прст штрчел надвор. Тој рече дека таму била убиена жена, а главата и била обезглавена пред куќата. Неколку метри подалеку се наоѓа поцрнето, отечено тело на мртов напаѓач на Хамас.
Првата линија на одбрана на Кфар Аза беа чуварите на заедницата, жители со воено искуство кои патролирале по периметарот. Тие биле убиени во борба со напаѓачите. Нивните тела биле отстранети утринава од нивните позиции во центарот на заедницата, и како и останатите израелски мртви, завиткани во црна пластика, однесени на носилки до паркингот и положени во ред во очекување да бидат однесени.
Жителите на израелските погранични заедници очекуваа повремени ракетни напади откако Хамас ја презеде контролата врз Газа во 2007 година. Тие ја прифатија опасноста како цена на селскиот живот во тесно поврзаната заедница која сè уште има траги од пионерскиот дух на раните ционистички населби.
Жителите на Кфар Аза и другите израелски заедници долж границата со Газа уживаа во добар квалитетен живот, и покрај заканите од ракетите на Хамас. Сите куќи имаа зајакнати безбедни простории. Имаа и тераси на отворено, скари, лулашки за деца и свеж воздух.
Но, никој во Кфар Аза или на друго место во Израел не замислуваше дека Хамас може да ја пробие одбраната на Израел и да убие толку многу луѓе, пишува Би-би-си.
Ужасот и гневот на Израелците се измешани со неверување дека државата и армијата не ја исполнија основната должност да ги заштитат своите граѓани. Телата на загинатите напаѓачи на Хамас кои убија толку многу беа оставени да скапуваат на сонце, лежејќи откриени каде што биле убиени во грмушките и рововите и широките тревници на заедницата.
Во близина на нивните тела се мотоциклите со кои влетаа во заедницата откако ја пробија граничната жица. Таму, остатоци од параглајдерите, со кои прелетаа над израелската одбрана, беа турнати на патека во цветна градина.
Би-би-си јавува дека татнежот на воздушните напади, додека тие биле во Кфар Аза, можел да се слушне континуирано од Газа. Израел страда од колективна траума по убиството на толку многу нивни сограѓани во саботата, пишува Би-би-си. Сепак, стотици цивили умираат и во Газа. Меѓународното хуманитарно право јасно кажува дека сите борци мора да ги штитат животите на цивилите.
Јасно е дека убиството на стотици цивили од страна на напаѓачите на Хамас е сериозно кршење на законите на војната. Израелците отфрлаат каква било споредба помеѓу начинот на кој Хамас убива цивили и начинот на кој палестинските цивили умираат во нивните воздушни напади.
