Агенцијата пренесува дека Бајден денеска ја прекинал својата реизборна кампања откако неговите колеги од Демократската партија загубиле верба во неговата ментална острина и способност да го победи републиканскиот противник Доналд Трамп.
Во објава на социјалната мрежа Икс, Бајден рече дека ќе остане во својата улога на претседател и врховен командант до истекот на неговиот мандат во јануари 2025 година и дека ќе ѝ се обрати на нацијата оваа недела.
„Најголема чест во мојот живот беше да ви служам како претседател. И иако планирав да одам на реизбор, верувам дека е во најдобар интерес на мојата партија и земја да се повлечам и да се фокусирам на исполнување на моите должности како претседател до крајот на мојот мандат“, напиша Бајден.
— Joe Biden (@JoeBiden) July 21, 2024
Бајден на мрежата Икс објави дека ја поддржува американската потпретседателка Камала Харис да го замени во претседателската трка.
„Колеги демократи, решив да не ја прифатам номинацијата и да ја фокусирам целата моја енергија на должностите на претседателот до крајот на мојот мандат“, напиша тој на Икс.
Тој додаде дека неговата прва одлука како кандидат на изборите во 2020 година била да ја избере Камала Харис за потпретседател и дека тоа е најдобрата одлука што ја донел.
„Денес сакам да ѝ ја дадам мојата целосна поддршка на Камала да биде кандидат на нашата партија оваа година. Демократи – време е да се собереме и да го поразиме (Доналд) Трамп“, напиша тој.