Но, барањето може да се соочи со противење во Конгресот, каде што некои екстремно десничарски републиканци – особено оние со блиски врски со поранешниот претседател Доналд Трамп – сакаат да ја намалат помошта од милијарди долари што Вашингтон му ја испраќа на Киев откако руските трупи извршија инвазија во февруари 2022 година.
Трамп, фаворит во трката за републикански претседателски кандидат во 2024 година, остро ја критикуваше американската поддршка за Украина во војната. Во јули, 70 членови на Претставничкиот дом го поддржаа неуспешниот предлог да се прекине финансирањето на Украина.
Водачот на мнозинството во Сенатот Чак Шумер рече дека има силна двопартиска поддршка во Сенатот предводен од демократите за поддршка на Украина, помош на Американците погодени од природни катастрофи и „борба против злото фентанил“.
„Најновото барање од Бајденовата администрација ја покажува постојаната посветеност на Америка да им помага на Американците овде дома и на нашите пријатели во странство, и треба да испрати јасен сигнал до Владимир Путин, кинеската влада и другите за американската одлучност кога станува збор за одбрана на демократијата ширум светот“, рече Шумер во изјава со која го поддржа барањето на Бајден.
Водачот на републиканците во Сенатот Мич Меконел соопшти дека со нетрпение очекува да го разгледа барањето за „да се уверат дека е неопходно и соодветно за зачувување на безбедноста на Америка, обезбедување на границите, поддршка на сојузниците и помош на заедниците во обновата по катастрофите“.
Меконел силно ја поддржа помошта за Украина, велејќи дека голем дел од парите се трошат во САД и наведувајќи ја важноста од обединувањето на „демократскиот свет“ против агресијата, без разлика дали станува збор за Русија или Кина.
Запрашан за критиките од републиканците во Претставничкиот дом дека барањето го прекршува буџетскиот договор постигнат во јуни, функционерот рече дека било јасно кога тој договор бил потпишан дека не ги исклучува барањата за итни финансирања. „Има работа што треба да се направи, но се надеваме дека можеме да се обединиме“, рече официјалниот претставник.
