Израел започна одмазда против Хамас, кој многу земји го сметаат за терористичка организација, откако милитантите на таа организација ја нападнаа земјата во саботата, убивајќи 1.200 луѓе. Досега се убиени и речиси толкав број на Палестинци.
Во завршната изјава на состанокот на Арапската лига се вели дека е неопходно заживување на мировниот процес и „отпочнување сериозни преговори меѓу Палестинската ослободителна организација (ПЛО), како единствен легитимен претставник на Палестинците, и Израел, со цел да се постигне фер и сеопфатен мир“.
Земјите-членки ги осудија убиствата и нападите врз цивилите од двете страни, според заменик-шефот на Арапска лига Хосам Заки. Хуманитарната помош, храната и горивото мора итно да бидат пуштени во Газа, рече тој.
Арапскиот свет е поделен околу конфликтот меѓу исламистичкиот Хамас и Израел. Додека Обединетите Арапски Емирати и Бахреин ги нормализираа односите со Израел, земјите од Заливот Катар, Кувајт и Оман го обвинуваат Израел за ескалацијата.
Ирак, исто така, ја истакна поддршката за палестинскиот народ. Саудиска Арабија побара итен прекин на насилството, а во исто време предупреди против „лишувањето на палестинскиот народ од неговите легитимни права“.
Земјата води трилатерални преговори со Израел и САД за нормализација на односите меѓу Ријад и Тел Авив. Аналитичарите веруваат дека овој ескалирачки конфликт им нанесе тежок удар на тие разговори за нормализација.