Од руската инвазија на Украина, дипломатските потези на францускиот претседател Емануел Макрон повремено предизвикуваат гнев кај некои од неговите сојузници и ги поттикнуваат да бидат претпазливи за неговите намери, и покрај тоа што Париз обезбедува значителна воена и финансиска помош за Украина.
Но, кога Зеленски слета во Џеда во петокот со француски Ербас каде присуствуваше на состанокот на Арапската лига, тоа беше успех за Макрон. Француските власти велат дека идејата да се донесе украинскиот лидер на состанокот на лидерите на Г7 се родила неколку недели по првичните разговори со јапонските домаќини.
„Украинците побараа претседателот Зеленски да биде пренесен на самитот од страна на француската армија“, изјави функционер близок до францускиот претседател, додавајќи дека конечната одлука била донесена во средата. Украинската делегација чекаше на полската граница пред да се качи на францускиот авион за Џеда.
Зеленски со учеството на состанокот на членките на Г7 сакаше да допре до оние земји кои останаа на маргините кога е во прашање конфликтот во Украина. Француските власти посочуваат дека не е првпат Париз да скокне и да му понуди авион на Зеленски.
Во февруари, по средбата на самитот на европските шефови на држави, украинскиот претседател беше пренесен од Брисел во Полска со авион на француската влада „Фалкон“.
