„Гнасната игра врз грбот на Албанците, оркестрирана од криминализираната клика на ДУИ, која постави мини во секој сегмент на системот на државата за време на своето 22-годишно владеење, сега е целосно разбрана од албанскиот народ“, велат од Вреди.
Оттаму тврдат дека за да остане на власт коалицијата Европски фронт предводена од ДУИ му понудила на ВМРО-ДПМНЕ да коалицираат во власта и да добијат четири министерства, но не и претседател на Собранието.
„Се покажа дека играта на ДУИ за злоупотреби е како за снимање холивудски филм. Интерпелацијата против Африм Гаши, иницирана од триномот Левица-ДУИ-СДСМ, заедно со спречувањето на Законот за бранителите од страна на Вреди, ја покажа вистинската природа на оваа клика. Балансерот, механизмот кој беше замрзнат поради уставните судии избрани за време на ДУИ и делегитимираната СДСМ, стана причина за нови тензии во таканаречениот Европски фронт“, тврдат од Вреди.
Според оваа коалиција, пратеникот на Европскиот фронт, Елми Азири, почнал да покажува знаци дека ја разбира играта на Али Ахмети и Артан Груби.
„Кулата од карти, изградена на коцкање, криминал и измами, сè повеќе го разјадува сознанието на пратеникот Азири. Тој, свесно или несвесно, почна да ја открива вистината што Вреди ја кажуваше од самиот почеток, уставните судии беа избрани од криминализираната ДУИ. Со оглед на тоа што иницијативата за оценка на уставноста на балансерот е поддржана од Нури Бајрами, баџанакот на Талат Џафери, а Артан Груби, како тогашен министер за политички систем и односи со заедниците, не сакал да достави аргументи до Антикорупциската комисија за вработувањата на Албанците во администрацијата, се продлабочува раздорот на овој таканаречен фронт. Одлуката на Уставниот суд за замрзнување на балансерот е уште една потврда дека ДУИ, наместо да ги искористи функциите во Владата со делегитимираната СДСМ за систематско решавање на статусот на Албанците, се фокусираше на ограбување на јавните пари и лично богатење“, велат од Вреди.
Од Коалицијата гарантираат дека замрзувањето на балансерот нема да го загрози правото на вработување на ниту еден Албанец, ниту на припадниците на други етнички заедници.
„Ние сме посветени на донесување на Закон за правична застапеност, кој ќе обезбеди правичност и ќе ги заштити интересите на сите граѓани, независно од нивната етничка припадност“, велат од коалицијата Вреди.
