Ласо прогласи вонредна состојба во покраините Манаби и Лос Риос и во градот Дуран, во близина на вториот најголем град во земјата, Гвајакил, еден ден откако беше убиен градоначалникот на крајбрежниот град Манта, Агустин Интриаго.
Потегот на претседателот е исто така одговор на немирите во затворот Пенитенциарија дел Литорал во Гвајакил кои вклучуваат судири меѓу членови на банди во затворот.
Ласо повеќе пати прогласуваше вонредна состојба, имајќи предвид дека немирите во затворите и брановите на насилство се честа појава во Еквадор.
„Не можеме да негираме дека организираниот криминал продре во државата, политичките организации и општеството, тоа е проблем што нѐ мачи повеќе од една деценија“, рече Ласо по состанокот на кабинетот.
Вонредната состојба ќе биде на сила 60 дена, додека траењето на полицискиот час ќе се менува во текот на наведениот период. Во меѓувреме, полицијата го истражува убиството на градоначалникот на Манта, изјави претседателот на државата.
Најмалку шест затвореници загинаа, а 11 се повредени по немирите во неделата, според податоците на управителот на затворот во Гвајакил.
Освен тоа, затворениците во затворите Котопакси, Азуај, Кањар, Ел Оро и Напо држат 96 чувари како заложници и го продолжуваат штрајкот со глад кој започна на 13 јули, без да ги откријат причините за штрајкот.
Затворскиот систем на Еквадор со децении се соочува со бројни структурни проблеми, а стапката на насилство се зголеми од 2021 година, откако во секојдневни пресметки се убиени околу 400 луѓе, што ја зголеми загриженоста на Обединетите нации.
