Предновогодишната 37 седница на Општина Карпош не заврши со очекуваното изгласување на буџетот. Советниците од ВМРО-ДПМНЕ поднесоа 3.800 амандмани. Според општинските органи амандманите не биле поднесени според пропишаната процедура, по што претседателот на Советот, кој е од Левица, не се согласил со предлогот амандманите да не бидат ставени на дневен ред.
На седницата не помина ни предлогот за донесување одлука за времено буџетирање.
Од денеска неизвесно е финансирањето на градинките и основните училишта на територијата на општината, како и платите за сите вработени и за лицата ангажирани на определено време.
Советниците од Независни за Карпош предупредуваат на можна целосна блокада на работата на општината, па затоа предлагаат советниците на ВМРО-ДПМНЕ да ги повлечат амандманите, да се обезбеди официјален документ од соодветна институција околу валидноста на амандманите и да се одржи седница.
А.Д.
