сабота, 20 јули 2024

Владата денеска одлучува колку помалку функционери во здравството ќе бидат на товар на граѓаните

Здравствените домови со над 1.000 вработени, универзитетските клинички центри, универзитетските клиники, клиничките болници и институтите ќе бидат раководени од само еден директор, кој ќе биде одговорен за организацијата и работењето на установата, како и за законитоста на работењето, предвидуваат предлог-измените на законот за здравствена заштита кои денеска треба да бидат ставени на дневен ред на Владата.

Објавено на

часот

Сподели

Владата на денешната седница ќе ги разгледува измените на предлог-законот за здравствената заштита, со што, како што најавуваат, ќе се укине институцијата економски директор во јавните здравствени установи. Премиерот Христијан Мицкоски, објави дека со мерката се стреми кон подобрување на ефикасноста во управувањето со здравствените установи, намалување на административните трошоци и насочување на парите кон подобрување на здравствените услуги.

„Новите законски одредби предвидуваат дека здравствените домови со над 1.000 вработени, универзитетските клинички центри, универзитетските клиники, клиничките болници и институтите ќе бидат раководени од само еден директор, кој ќе биде одговорен за организацијата и работењето на установата, како и за законитоста на работењето. На овој начин ќе се лоцира и одговорноста и ќе се укине дуализмот во одлучувањето. Верувам дека оваа реформа ќе овозможи пренасочување на средствата кон подобрување на здравствените услуги и инфраструктурата, зголемување на транспарентноста и отчетноста во работењето, како и подобрување на условите и квалитетот на здравствените услуги за сите граѓани“, објави Мицкоски на својот фејсбук профил.

Укинувањето на економските директори во здравствените установи, беше најавено и од министерот за здравство Арбен Таравари пред една недела.

Мицкоски, вчера изјави дека со законот што денеска ќе биде на владина седница се укинуваат организациските места или таканаречените економски директори во здравствените установи, односно, рече тој, „ставаме точка на дуализмот.“

„Мора да има едно лице коешто ќе биде одговорно и едно лице коешто ќе има обврски, права, но и одговорности пред граѓаните. Вака бевме сведоци на префрлање на обврските и на одговорностите и практично не можевме да локализираме јасно каде е одговорноста. Сега, со овој потег, јасно ќе знаеме каде е локализирана одговорноста“, рече Мицкоски нагласувајќи дека со овие законски измени ќе има над стотина функционери помалку „коишто се на товар на граѓаните“.

Соопшти дека „многу скоро од денеска ќе биде ребалансот на буџетот, до крајот на оваа недела ќе бидат познати замениците министри, а на прашањето да открие нови именувања на директори, одговори дека „неколку часа од денеска ќе има нови именувања“. Исто така, на дневен ред на Владата, рече, ќе дојде и Законот за локална самоуправа, а најави и дека се подготвува законско решение за игрите на среќа, кое рече, ќе подразбира најпрво ревидирање на сите согласности дадени од претходната Влада.

ТОП ВЕСТИ

ПОСЛЕДНИ ВЕСТИ