Европските лидери треба да донесат историски одлуки на самитот оваа недела за отворањето на пристапни преговори со Украина и испорачувањето на четиригодишен пакет помош од 50 милијарди евра што на Киев очајно му е потребен за неговата пропадната воена економија, но прво мора да ги надминат приговорите на Унгарија за двете теми, пишува Политико.
„Финансирањето на Унгарија од ЕУ и финансирањето на Украина се две посебни прашања, но ако ЕУ инсистира на тоа финансирањето на Украина да доаѓа од изменетиот буџет на ЕУ, тогаш двете прашања стануваат поврзани“, рече Балаш Орбан, кој не е во сродство со унгарскиот премиер.
Коментарите на соработниците на унгарскиот лидер доаѓаат во време кога Европската комисија треба да деблокира 10 милијарди евра од фондовите на ЕУ како награда за судските реформи спроведени од Будимпешта како одговор на загриженоста на Брисел за независноста на судството.
Сепак, се очекува дека остатокот од блокираните средства – околу 11,7 милијарди евра – ќе останат замрзнати поради прашања поврзани со заштитата на човековите права, доделувањето јавни договори и состојбата на академската слобода во земјата.
Будимпешта чека и исплата на 10,4 милијарди евра грантови и евтини заеми од фондот на ЕУ за закрепнување по пандемијата, кој исто така се очекува да остане блокиран додека Унгарија не спроведе серија антикорупциски реформи.
Сепак, помошникот на премиерот рече дека Будимпешта ќе го укине ветото само доколку Брисел ја исплати целата замрзната готовина, што би изнесувало околу 30 милијарди евра.
Одлуката на Европската комисија би можела да биде објавена непосредно пред европските лидери да почнат да разговараат за новиот пакет помош за Киев, како и за отворањето на преговорите за пристапување на Украина во Европската унија, на што премиерот Орбан остро се спротивстави.
Советникот на премиерот рече дека членството на Украина во ЕУ останува „црвена линија“ за Будимпешта и додаде дека наместо тоа на Киев треба да му се понуди стратешко партнерство, бидејќи сѐ уште не ги исполнил критериумите за отворање на пристапните преговори.
