недела, 14 јули 2024

Училишната област во Јута ја отстранува Библијата од училиштата поради „вулгарност и насилство“

Објавено на

часот

Сподели

Овој потег уследи по поплаките од родителите дека Библијата на кралот Џејмс, 400 години стара верзија на англиски превод, содржи содржина несоодветна за деца.

Одлуката беше донесена оваа недела од училишниот округ Дејвис, северно од главниот град на Јута, Солт Лејк Сити, по жалбата поднесена во декември 2022 година, објави Би-би-си.

Официјалните лица рекоа дека веќе отстраниле седум или осум примероци од Библијата што ја имале на своите полици, истакнувајќи дека текстот никогаш не бил дел од наставниот план и програма за учениците.

Комисијата не го објасни својот потег подетално, ниту пак прецизираше кои пасуси во Библијата содржат „вулгарност и насилство“.

Според весникот Солт Лејк трибјун, родителот што се жалел рекол дека Библијата на кралот Џејмс „нема сериозна вредност за малолетниците“, бидејќи е, како што рече, „порнографска според нашата нова дефиниција“, повикувајќи се на законот за забрана на книги од 2022 година.

Во пресудата на округот е утврдено дека содржината на Библијата не го прекршува законот од 2022 година, но дека вклучува „вулгарност или насилство што не е соодветно за помладите ученици“. Книгата ќе остане во локалните средни училишта.

Конгресменот од Јута, Кен Ејвери, кој го напиша законот од 2022 година, претходно го отфрли барањето за отстранување на Библијата како „шега“, но се предомисли оваа недела, нарекувајќи ја книгата „предизвикувачко четиво“ за помалите деца.

„Традиционално, во Америка Библијата најдобро се учи и најдобро се разбира во домот и околу огништето, во рамки на семејството“, напиша тој на Фејсбук.

Како што потсетува Би-би-си, училиштен округ во Тексас минатата година ја повлече Библијата од своите библиотеки, а минатиот месец учениците во Канзас побараа Библијата да биде отстранета од нивната училишна библиотека.

Републиканските власти од Јута донесоа закон во 2022 година со кој се забрануваат „порнографски или непристојни“ книги во училиштата.

Најголем дел од книгите кои досега беа забранети се однесуваат на теми како што се сексуалната ориентација и идентитетот.

Забраната на Библијата доаѓа во услови на зголемени напори на американските конзервативци да го забранат учењето на контроверзни теми како што се ЛГБТ правата и расниот идентитет.

Забрани за одредени книги кои се сметаат за навредливи се во сила и во американските сојузни држави Тексас, Флорида, Мисури и Јужна Каролина.

ТОП ВЕСТИ

ПОСЛЕДНИ ВЕСТИ