четврток, 25 јули 2024

САД испратија предупредување до Хезболах: „Не сметајте на нас ако ве нападне Израел“

Американските власти упатија необично предупредување до Хезболах, порачувајќи ѝ на либанската паравоена група дека Вашингтон нема да го спречи Израел да ги нападне.

Фото: ЕПА

Објавено на

часот

Сподели

Според Политико, повикувајќи се на извори од американската влада, пораката била дизајнирана да ја поттикне шиитската милиција да се повлече и да ја деескалира кризата што се развива долж израелско-либанската граница. „Не сметајте на наша помош доколку Израел реши да нападне“, гласи американската порака.

Многу американски функционери се резигнирани поради можноста Израел да го нападне Хезболах во јужен Либан во наредните недели.

Двајца американски функционери изјавија за Политико под услов да останат анонимни дека Хезболах исто така мора да разбере дека Вашингтон ќе му помогне на Израел да се одбрани ако Хезболах возврати. Тие нагласија дека милитантната група не треба да смета на тоа дека Америка ќе дејствува како кочница при израелското донесување одлука.

Пораката се пренесува индиректно, а САД не се соочуваат со Хезболах еден на еден затоа што тие се означени како терористичка организација и се потпираат на јавни комуникации или посредници.

Американскиот специјален пратеник Амос Хохштајн и други американски официјални претставници отпатуваа во регионот во последниве денови за да ги повикаат ​​двете страни на воздржаност, додека во Вашингтон постои сè поголемо чувство дека ескалација е неизбежна.

„Израел мора да го направи она што треба да го направи“, рече претставник на Министерството за одбрана.

Израел и Хезболах се вклучени во конфликт на ниско ниво со месеци, со размена на оган и одредени операции по терористичкиот напад на Хамас врз Израел и израелската одмазда во Појасот Газа. Конфликтите меѓу Хезболах и Израел се интензивираа во последните неколку недели откако се намали интензитетот на израелските операции во Газа.

Американските власти стравуваат дека сеопфатна битка меѓу Израел и Хезболах, кој, како Хамас, е поддржан од Иран, но е посилен и подобро вооружен, може да го втурне регионот во сеопфатна војна, имајќи предвид дека Хезболах е исто така голем сојузник на Иран. Тоа е сценарио кое тие се обидуваат да го спречат откако изби војната меѓу Израел и Хамас минатиот октомври.

ТОП ВЕСТИ

ПОСЛЕДНИ ВЕСТИ