Администрацијата на Бајден во петокот употреби вонредни овластувања според Законот за контрола на извозот на оружје за да ја олесни продажбата на оружје во вредност од 106,5 милиони долари, објави во саботата Пентагон.
САД очекуваат сите земји што добиваат американска воена помош да ја користат „со целосно почитување на меѓународното хуманитарно право и законот за војна, а Израел не е исклучок“, изјави за новинарите портпаролот на Стејт департментот Метју Милер.
Милер беше прашан од новинарите дали Вашингтон утврдил дали Израел ја почитува американската политика за трансфер на конвенционално оружје од февруари оваа година. Политиката наложува Стејт департментот да утврди дека оружјето нема да се користи за геноцид, злосторства против човештвото, кршење на Женевските конвенции и тешки прекршувања на меѓународното право.
Милер рече дека Стејт департментот не ја донел таа определба и ја повтори американската позиција дека Израел може да стори повеќе во конфликтот во Газа за да ги намали цивилните жртви. На прашањето дали САД собираат информации за тоа дали се извршени воени злосторства во тој конфликт, Милер рече: „Ние следиме сѐ што се случува во тој конфликт. Разговараме со израелската влада“.
