Како што наведува министерството, санкциите се воведени „на прорускиот националистички лидер на босанските Срби“ како и на други поединци и ентитети кои се поврзани со него.
На списокот на министерството од 20 октомври се наоѓаат и Горица и Игор Додик, синот и ќерката на претседателот на Република Српска.
„Членовите на оваа мрежа, меѓу кои се и децата на Додик, ја олеснуваат корупцијата на Додик во босанскохерцеговскиот ентитет РС, му овозможуваат да црпи јавни средства од РС и да се збогатува себеси и своето семејство на сметка на граѓаните на БиХ и функционалните власти во земјата“, се наведува во соопштението на американското министерство.
Се додава дека Додик, кој претходно беше член на Претседателството на БиХ, ја користел и користи службената позиција во БиХ за „акумулирање лично богатство преку подмитување, мито и други облици на корупција. Неговата етно-националистичка реторика на поделба ги одразува неговите напори да ги оствари овие политички цели и да го одвлече вниманието од сопственото коруптивно дејствување“, се наведува.
Се додава дека Додик јавно ги понижува „другите етнички и верски групи во БиХ со што ги продлабочува поделбите и политичкиот ќорсокак“.
САД против Додик воведоа санкции и на 5 јануари 2022 година, но и на 17 јули 2017 година за наводно опструирање на Дејтонскиот мировен договор.
Додик се наоѓа и под санкции на Британија.
