Во тужбата, поднесена до американскиот окружен суд на Менхетн, руско-австрискиот сопран бара најмалку 360.000 долари отштета на име изгубена добивка од неодржаните настапи и проби.
Нетребко тврди дека Метрополитен опера, или скратено Мет, ѝ предизвикала „тешка душевна мака и емоционално растројство“, вклучувајќи „депресија, понижување, срам, стрес и анксиозност, како и емоционална болка и мака“.
Мет се откажа од идните ангажмани на Нетребко набрзо откако Русија ја изврши инвазијата на Украина во февруари 2022 година.
Гелб од оперската пејачка бараше да се дистанцира од претседателот на Русија Владимир Путин.
„Од руската инвазија на Украина, Мет и Питер Гелб ја користеа Ана Нетребко како жртвено јаре во својата кампања за дистанцирање од Русија и поддршка на Украина“, се наведува во соопштението на 51-годишната Нетребко.
Во моментов нема реакција на Мет или Гелб на тужбата.
Американскиот еснаф на музички уметници поднесе приговор на арбитражата во име на оперската пејачка, а арбитерот Хауард Си Еделман во февруари оваа година утврди дека Мет го прекршил колективниот договор со синдикатот со тоа што ги откажал договорите на Нетребко.
Арбитражата ѝ досуди на Нетребко отштета за изгубените настапи, која синдикатот ја процени на 209.103,48 долари.
Нетребко, која дебитираше во Мет во 2002 година, требаше да го добие најголемиот износ на хонорар кој го доделува оваа оперска куќа – 17.000 долари по настап, се наведува во тужбата.
Во тужбата се тврди дека Нетребко е дискриминирана поради националното потекло.
Нетребко наведува дека Мет и Гелб „му наштетиле на нејзиниот однос со публиката, вклучувајќи поттикнување протести против нејзините настапи“. Таа наведува дека нејзината „репутација ја предизвикале Мет и Гелб довела до тоа другите оперски куќи и културни институции во Соединетите Држави да се воздржат од ангажирање на Нетребко“.
Во тужбата се наведува дека „руските политичари, поради барањето на Мет Нетребко да дава јавни изјави против постапки на руската влада, ја жигосале Нетребко, руските театарски куќи ги откажале договорите со неа, руската публика ја критикувала на нејзините канали на социјалните мрежи, како и рускиот печат, а Нетребко и нејзиното семејство и пријателите во Русија се изложени на ризик руската влада да им наштети или да спроведе одмазда врз нив“.
Додека отсуствува од САД, Нетребко во јуни ја отвори стотата сезона на италијанската Арена ди Верона, со нова продукција на „Аида“ на Верди.
Планирано е месецов да настапи во Театар Колон во Буенос Аирес во Аргентина, а има и ангажмани со берлинска Штатсопера унтер ден Линден, Виенската државна опера, миланска Ла Скала и Париската опера.
