Руското Министерство за одбрана соопшти дека украинско беспилотно летало е уништено во воздух над областа Одинцово, а уште две се срушиле во Москва, пренесува ТАСС.
Едно лице е повредено во експлозија во зграда, јави ТАСС, повикувајќи се на итните служби. Аеродромот е затворен за пристигнувања и полетувања, соопшти агенцијата.
„Украински беспилотни летала нападнаа вечерва. Фасадите на две градски канцелариски кули се малку оштетени“, објави градоначалникот на Москва Сергеј Собјанин на Телеграм.
#Russian officials report a drone attack on #Moscow. One of the towers of the Moscow City complex was damaged. pic.twitter.com/g6yKOkTOuC
— NEXTA (@nexta_tv) July 30, 2023
Украинската влада не одговори веднаш на барањето за коментар и не презеде одговорност за нападите. Денешниот напад е последен во серијата неодамнешни напади со беспилотни летала, вклучувајќи го и оној врз Кремљ и руските градови во близина на границата со Украина, за кои Москва го обвини Киев.
Русија во понеделникот соопшти дека жестоко ќе ѝ возврати на Украина откако две беспилотни летала оштетија згради во Москва, со еден напад во близина на зграда каде војската одржува брифинзи за, како што Русија ја нарекува својата „специјална воена операција“ во Украина. Украинскиот вицепремиер Михаило Федоров тогаш изјави дека ќе има нови напади со беспилотни летала.
