Предлог законот е усвоен едногласно, но мора да биде изгласан и во второто и третото читање.
„Силното семејство беше прогласено за традиционална вредност во Русија во 2022“, истакнаа авторите на текстот, меѓу кои се и претседателката на горниот дом на парламентот Валентина Матвиенко и претседателот на Думата Вјачеслав Володин.
„Една од заканите за традиционалните вредности во руското општество е промовирањето на идеологијата на живот без деца која доведува до слабеење на општествените институции и создава околности за депопулација“, истакнаа тие.
Според нив, неколку заедници и групи на интернет промовираат таков начин на живот и имаат агресивен став кон луѓето кои имаат деца.
„Затоа треба да се создаде механизам за заштита на традиционалните вредности“, објаснија авторите, предложувајќи да се забрани промовирањето живот без деца на интернет, во медиумите, на филмовите и во рекламите.
Според Володин, физичко лице според предложениот закон би можело да биде казнето со околу 4.000 евра, функционерите двојно, а правните лица до 47.000 евра.