Нападот на танкерот Стринд се случил на околу 60 наутички милји (111 километри) северно од теснецот Баб ал-Мандаб, кој ги поврзува Црвеното Море и Аденскиот Залив, околу 21 часот по локално време, изјави американски претставник за Ројтерс. Друг американски функционер рече дека Стринда можел да се движи на свој погон во часовите по нападот. Хутите, кои значително го проширија својот арсенал на оружје во последниве години, ја презедоа одговорноста за нападот.
„Во моментот на нападот немаше американски бродови во близина, но разурнувачот на американската морнарица УСС Мејсон одговори на повикот од Стринда и во моментов дава помош“, соопшти Централната команда на американската војска, која ги надгледува американските сили на Блискиот Исток.
CENTCOM Statement on missile attack in the Bab-el-Mandeb
At around 4 p.m. EST on December 11, the Motor Tanker STRINDA was attacked by what is assessed to have been an Anti-Ship Cruise Missile (ASCM) launched from a Houthi controlled area of Yemen while passing through the… pic.twitter.com/OJDoubAU2D— U.S. Central Command (@CENTCOM) December 12, 2023
Танкерот за превоз на хемикалии плови под норвешко знаме.
Хутите, кои му се наклонети на Иран, се вплеткаа во конфликтот меѓу Израел и Хамас, кој се прошири низ Блискиот Исток од 7 октомври, по масакрот на цивилите од страна на Хамас во јужен Израел. Оттогаш, Хутите постојано напаѓаат бродови кои минуваат низ клучните водни патишта во близина на Јемен и гаѓаат со беспилотни летала и проектили врз самиот Израел.
Во саботата тие рекоа дека ќе ги нападнат сите бродови кои се движат кон Израел, без разлика на знамето под кое пловат, и ги предупредија меѓународните бродски компании да не соработуваат со израелските пристаништа.
Танкерот Стринда превезувал растително масло и биогорива и пловел кон Венеција, Италија, според податоците на компанијата за следење на бродови Кплер. Не е јасно дали Стринда има некаква врска со Израел.
Групата Хути, која владее со поголемиот дел од Јемен, вели дека нејзините напади се знак на поддршка за Палестинците и вети дека ќе продолжат се додека Израел не ја прекине офанзивата на Појасот Газа, кој се наоѓа на повеќе од 1.600 километри од седиштето на Хутите во Сана.
Хутите се една од неколкуте групи во Оската на отпорот, која е поврзана со Иран, која ги гаѓаше израелските и американските цели откако нивниот палестински сојузник Хамас го нападна Израел.
Во текот на првата недела од декември, три комерцијални бродови беа нападнати во меѓународни води, поради што интервенираше разурнувач на американската морнарица. Хутите минатиот месец запленија и товарен брод во британска сопственост поврзан со израелска компанија и објавија видео од нападот.
Соединетите држави и Велика Британија ги осудија нападите врз бродовите, обвинувајќи го Иран за неговата улога во поддршката на Хутите. Техеран вели дека неговите сојузници одлучуваат независно. Саудиска Арабија побара од САД воздржаност во одговорот на нападите.
