Унгарија и Турција се единствените членки на Алијансата кои сѐ уште не ја прифатиле Шведска во НАТО. Ова бара едногласно одобрување од сите членки, а одложувањето од повеќе од една година на Будимпешта и Анкара да го одобрат ги фрустрира другите кои сакаат да ја прошират Алијансата поради руската војна во Украина.
Орбан одамна вети дека Унгарија нема да биде последна што ќе го ратификува приемот на Шведска во Алијансата, но најверојатно Турција ќе ја претекне, чиј Парламент, според турските медиуми, оваа недела ќе гласа за приемот на Шведска, бидејќи тој веќе е одобрен од Комисијата за надворешна политика на Парламентот во јануари.
Today I sent an invitation letter to Prime Minister Ulf Kristersson @SwedishPM for a visit to Hungary to negotiate on Sweden’s NATO accession.
— Orbán Viktor (@PM_ViktorOrban) January 23, 2024
Турскиот претседател Реџеп Таип Ердоган се откажа од своето противење на приемот на Шведска минатата година како одговор на напорите на Стокхолм да дејствува, на негово барање, против поддржувачите на курдските милитанти и другите групи во Шведска кои Анкара ги гледа како закана за својата безбедност.
Додека Орбан вели дека неговата влада го поддржува приемот на Шведска во алијансата, тој тврди дека пратениците од неговата владејачка партија Фидес не се убедени поради, како што ги нарече, „флагрантните лаги“ од шведските политичари за состојбата на демократијата во Унгарија.
Шведска и Финска се откажаа од децениската неутралност и побараа прием во НАТО, загрижени за безбедноста поради руската инвазија на Украина. Минатата година Финска стана 31-ва членка на НАТО, откако Унгарија и Турција беа последните две земји што го ратификуваа нејзиното барање.
Доколку за ова прашање не се свика вонредна седница на унгарскиот парламент, првата можност кога би можело да се разгледа приемот на Шведска е редовната седница, која се очекува дури на 26 февруари.