вторник, 23 јули 2024

Николоски: Ќе има одговорност за душманското трошење на парите од Пошта и Железници

Јас знаев дека секторот кој што го преземам ќе биде тежок, но е многу полошо и многу потешко од моите најлоши очекувања и предвидувања. Со години не се работело ништо и се оставале проблемите под тепих. И јас како министер на оваа позиција сум само 12 дена до денес и не можам за 12 дена да решам нешто што изминатите седум години било запоставувано, но се обидувам да помогнам колку можам, изјави вечерва за ТВ Алфа Александар Николоски, вицепремиер за економски прашања и министер за транспорт.

Објавено на

часот

Сподели

„Она што можам да го ветам на сите дека во мојот мандат нема ниту еден човек од секторите кои што се под мене да остане без работа без негова волја. Сега ние имаме две паралелни реалности, ако ги гледате компаниите, пред сѐ тука мислам на Македонски железници – транспорт, Македонски железници – инфраструктура. Tоа се две различни претпријатија, едните ги имаат возовите под нив, а другите ги имаат пругите под нив и Македонска пошта. И ако гледате чисто менаџерски тие се во многу лоша состојба. Но, ако гледате од човечки аспект од таму егзистираат 4.400 семејства, кои што секој месец треба дома да однесат нешто и да живеат нормално во текот на тој месец. И затоа работите не можат да се гледаат праволинински“, појасни Николоски.

Тој посочи дека според него првично треба да се направи стабилизација за која што е потребно од 5 до 6 месеци. И откако ќе се направи стабилизацијата ќе се направи и рационализација за да се увиди зошто се трошеле средства, како се трошеле истите и кој ги трошел.

„Секаде каде што има сомнежи за криминал да си влезе МВР и да си ги испоапси тие што го правеле тој криминал. Не е случајно тоа што овие претпријатија се донесени во таа состојба. А, јас не случајно ја повикав МВР да влезе во мојот ресор и во фирмите кои што се под мене“, рече министерот Николоски.

Тој укажа дека е потребно среднорочно и долгорочно да се направи план како претпријатијата да станат профитабилни.

„Трите претпријатија ја имаат потрошено платата за оваа година комплетно. Значи досегашните менаџери тоа што требало да го потрошат за 12 месеци, го потрошиле за 6 месеци. Тоа е душмански однос кон претпријатијата што ги водea. И за тоа мора да има одговорност“, истакна министерот.

„Јас не смеам да дозволам луѓето кои  егзистираат од овие претпријатија да останат без приходи затоа што на крајот на денот тие луѓе не се виновни што претходната влада на Заев и Ахмети ставила такви менаџери какви што ставила“, нагласи Николоски.

ТОП ВЕСТИ

ПОСЛЕДНИ ВЕСТИ