Најмалку три големи пожари избувнаа во вторникот вечерта на Мауи, отсекувајќи ја западната страна на островот и историскиот град Лахаина, каде што беа уништени или оштетени најмалку 271 градба.
Најмалку 55 лица загинаа, многу повеќе се здобија со изгореници, вдишување чад и други повреди. Продолжуваат напорите за пребарување и спасување, а илјадници луѓе ја напуштија областа.
Началникот на полицијата во Мауи, Џон Пелетиер, рече дека голем број луѓе сè уште се водат како исчезнати, но тешко е да се каже точно колку, делумно поради телекомуникациските проблеми.
Гувернерот на Хаваите, Џош Грин изјави дека речиси сите згради ќе треба да се обноват, што ќе чини милијарди долари и ги повика хотелите да сместат илјадници луѓе кои останаа без покрив над главата.
Поставени се најмалку шест засолништа, а речиси 30.000 туристи се евакуирани, објави Си-ен-ен, повикувајќи се на туристичките власти.
