вторник, 23 јули 2024

ММФ даде зелено светло за заем од 800 милиони долари на Аргентина

Меѓународниот монетарен фонд (ММФ) ѝ го отвори патот на Аргентина да повлече 800 милиони долари за помош на нејзиното економско закрепнување, објавувајќи дека програмата за кредитирање е „цврсто на вистинскиот пат“.

Фото: ЕПА

Објавено на

часот

Сподели

Аргентина со ММФ има програма од 44 милијарди долари, која вклучува економски цели поврзани со растот, инфлацијата и девизните резерви. Во вчерашното соопштение ММФ наведе дека нивниот Извршен одбор ја завршил осмата ревизија на тој аранжман.

„По завршувањето на ревизијата, Извршниот одбор оцени дека програмата е цврсто на вистинскиот пат, со сите квантитативни критериуми за извршување исполнети до крајот на март 2024 година“, објави ММФ.

Тој, исто така, додаде дека за одржување на овој напредок ќе биде потребно подобрување на квалитетот на фискалното прилагодување, преземање чекори кон подобрена рамка на монетарната и девизната политика и спроведување на реформи за раст.

Аргентинската влада најави дека ќе започне разговори со ММФ за нова програма.

Одобрувањето од ММФ доаѓа откако аргентинскиот претседател Хавиер Милеи, кој ја презеде функцијата во декември, спроведе опсежни фискални реформи и сериозно ги ограничи владините трошоци за да се справи со троцифрената инфлација, пад на економијата и девизните резерви во минус.

Промените што ги воведе ѝ помогнаа на Аргентина да ги врати исцрпените девизни резерви, да постигне фискални суфицити на почетокот на годината и да ја стабилизира својата валута, пезосот.

Месечната стапка на инфлација во Аргентина во мај беше најниска од 2022 година, покажаа официјалните податоци во четвртокот, ослабнувајќи петти месец по ред на 4,2 отсто благодарение на мерките за штедење на Милеи.

Сепак, тамошната влада се соочува со предизвици, бидејќи економијата запира, а нивото на сиромаштија расте. Во средата избувнаа протести во главниот град поради понатамошните реформи кои предвидуваат буџетски кратења.

Пакетот реформи, предложени од Милеи за заживување на пропаднатата економија во земјата вклучува прогласување вонредна состојба, намалување на пензиите и намалување на работничките права.

ММФ забележува дека Аргентина ќе има потреба од континуирани напори за поддршка на ранливите и постигнување „агилно“ креирање политики во иднина.

ТОП ВЕСТИ

ПОСЛЕДНИ ВЕСТИ