Еден од најдобрите македонски репрезентативци, Бојан Миовски, смета дека треба да дадеме рано гол на гостувањето кај Фарски Острови за да имаме полесен натпревар.
„Во изминатиот период имаше пријателски натпревари и потешки мечеви во квалификациите за кои велевме дека се дуели за да се воигруваме, тој момент завршува, сега ни се важни бодовите и да се квалификуваме на едно големо натпреварување. Во одлична група сме, фаворити сме и тоа треба да го покажеме на терен“, вели Миовски.
„Мислам дека сите сме подготвени, од прв до последен и се надеваме дека ќе почнеме со три бода. Фарски Острови важат за аутсајдер, но тоа е противник кој мора многу сериозно да го сфатиме и од првата минута да бидеме на висината на задачата“.
„Имаме стратегија која ја прави селекторот и ќе се обидеме да играме тимски и кој е во подобра позиција да биде проигран и да го отвориме резултатот колку што е можно побрзо. Доколку не дадеме гол брзо ќе биде тешко за нас, но се надевам дека тоа нема да биде така, се надевам дека рано ќе дадеме гол и ќе биде полесно“.
Миовски вели дека нема притисок, секогаш е мотивиран да дава голови, се надева дека тие наскоро ќе дојдат и за репрезентацијата, а во иднина цели да биде еден од лидерите во националниот тим.
„Никогаш немам притисок, ги знам моите квалитети од многу поодамна, мотивација ми е да давам голови и за клуб и за репрезентација, секогаш кога сум на терен давам 100 проценти, па мислам дека ќе дојдат и головите“.
„Играм во топ три лиги во светот и секако дека тоа е големо достигнување. Го бирав секој чекор внимателно каде ќе играм и каде ќе се надоградувам како играч и нормално дека ми е чест што оваа сезона ќе играм во Лигата на шампионите и тоа искуство сакам да го искористам и да се наметнам како носител во иднина и да бидам голгетер“.
