Дванаесеттиот претседател на Аргентина по враќањето на демократијата во земјата пред 40 години, Хавиер Милеи (53) положи заклетва во парламентот „во името на Бога, татковината и светите евангелија“, со заклетва за „лојалност и патриотизам“. Потоа помошниците му ја ставија сино-белата претседателска лента преку рамото.
По кратката церемонија одржана напладне, Милеи го одржа својот прв говор како претседател, но не пред парламентарците, како што налага традицијата, туку од скалите на зградата на парламентот пред илјадници луѓе кои се собраа на големиот плоштад истакнувајќи аргентински знамиња и дресови на аргентинската фудбалска репрезентација.
Милеи е економист без искуство во извршната власт, а со години бил познат како популарен полемичар во ТВ емисии и за кратко време успеа аргентинската политика да ја преврти наопаку.
Самиот призна дека е голем обожавател на Доналд Трамп, а неговата крајно антиуставна политика е најслична на Трамповата и на поранешниот бразилски претседател Жаир Болсонаро и може да се дефинира како најприземен десен популизам и ултра-конзервативизам, неодамна оцени Фајненшл тајмс.
На 19 ноември победи во вториот круг од претседателските избори против својот противкандидат, центристичкиот министер за економија во заминување Серџо Масу, со 55,6 отсто од гласовите.
Како трета по големина економија во Латинска Америка, соочена со хронична инфлација (дури 143 отсто во година дена), со структурен долг и со 40 отсто сиромашни граѓани, Аргентина се подготвува за болни прилагодувања во наредните денови и недели, додека новиот претседател ветува шок-терапија за да влијае на намалувањето на јавната потрошувачка.
