Иле Танев, бранител на обвинетиот Анџело Ѓорѓиевски, на денешната јавна седница истакна дека мотивите што се наведени за убиство, како што рече, „не може да опстојат бидејќи немало никакво познанство помеѓу обвинетиот и оштетениот“.
„Во една ваква состојба не постои никаква умисла. Го оспоруваме делот дека судот прифаќа дека кај тројцата обвинети се вродила некаква умисла сите тројца да го сторат ова кривично дело“, рече Танев.
Според него, околностите што им одат во корист на обвинетите не се земени предвид.
„Како што е расправијата во таксито, начинот на настанатата ситуација и тоа што Анџело дава прва помош“, посочи Танев.
Според адвокатот, алкохолизирана состојба на ракометарот дала голем придонес за да се случи тоа што се случи и последиците да бидат такви какви што биле.
Бранителот на обвинетата Клементина Левковска, Емил Гугутчески, побара предметот да се врати на повторно судење и истакна дека судот не го обезбедил клучниот сведок, односно таксистот.
Еленко Миланов, бранител на обвинетиот Андреј Костовски, истакна дека ова дело не може да се квалификува како убиство или соизвршителство.
„Неспорно од она што произлегува од тие видео записи е дека по првичниот пад на плочникот на сега починатиот Тот, истиот нема никакво самостојно движење“, посочи адвокатот Миланов, образложувајќи дека ударот од Андреј во градниот кош, според него, не можел да доведе до последиците кои настанале.
По завршувањето на јавната седница Миланов изјави дека смета дека во конкретниот случај правната квалификација дека станува збор за „убиство“ е спорна за сите обвинети.
– Каде што нема модринка, нема знаци на повреда, а тоа е единственото дејствие кое што го врзува како соизвршител за кривично дело убиство, рече тој, дополнувајќи дека оттука, смета дека не може, во однос на Андреј да биде таа правна квалификација, ниту, како што рече, „што било друго од она што го утврдува првостепениот суд“.
Бранителот на обвинетата Клементина Лековска, Бојан Василевски рече дека очекуваат дека жалбите ќе бидат уважени.
„Очекуваме дека првостепената пресуда ќе биде укината и дека ќе одиме на повторно судење. Сите бранители жалбата ја побиваме по четирите основи. Сметаме дека има суштествени повреди на постапката, дека не е целосно утврдена фактичката состојба, дека е повреден Кривичниот Законик и дека е превисока казната, практично по сите основи“, рече тој.
Обвинетите, исто така, се приклучија кон жалбите на своие бранители и истакнаа дека не посакувале да се случи тоа што се случило.
Обвинителството, од друга страна, предложи жалбите да се одбијат како неосновани, бидејќи, според нив, фактичката состојба е правилно утврдена.
Основниот кривичен суд Скопје во ноември минатата година ги осуди Анџело Ѓорѓиевски и Клементина Левковска по 18 години казна затвор, а Андреј Костовски на 16 години за убиството на хрватскиот ракометар кој почина на 8 април 2022 откако беше претепан од обвинетите пред ноќен клуб во Градскиот парк во Скопје.
Според обвинителниот акт, Ѓорѓиевски, Левковска и Костовски, на 7 април, по кратка расправија го нападнале Тот и му задале повеќе удари и тешки телесни повреди од кои кај него најпрво настанала коматозна состојба, а следниот ден починал.
Процесот го водеше судијката Елена Илиевска Јосифовиќ, а обвинението го застапуваше обвинителката Тања Трајчевска.
