„Ние не сме потписници на статутот, не го признаваме. Ова не е прва одлука, исто така знаеме дека постојат разни затворени процеси кои се чуваат во тајност. Согласно на тоа и ги третираме таквите одлуки“, кажа портпаролот на Кремљ Дмитриј Песков.
Меѓународниот кривичен суд издаде налози за апсење на двајцата високи руски команданти Сергеј Иванович Кобилаш и Виктор Николаевич Соколов, поради обвиненија дека наводно извршиле воени злосторства во Украина од 10 октомври 2022 до 9 март 2023 година.
„Сергеј Кобилаш, генерал-потполковник на Оружените сили на Русија, кој во релевантното време бил командант на авијацијата на Воздухопловно-вселенските сили, и Виктор Соколов, адмирал во руската морнарица, кој бил командант на Црноморската флота, се одговорни за воени злосторства насочување напади на цивилни објекти и воени злосторства нанесување прекумерна штета на цивили или на цивилни објекти“, се наведува во соопштението на судот.
Се додава дека тие двајца се обвинети и за злосторства против човештвото.