Разговорот меѓу двајцата високи функционери се одржа пред планираната посета на Блинкен на Пекинг, чија цел е да се намалат тензиите меѓу двете светски сили за повеќе прашања, од наводи за шпионажа до конфликти со полупроводници, пренесува Ројтерс.
За време на разговорите, Чин рече дека се надева оти Америка ќе покаже разбирање, ефикасно ќе управува со разликите и ќе ја промовира комуникацијата и соработката.
Чин, исто така, истакна дека Америка треба да ги почитува основните грижи на Кина, како што е проблемот со Тајван.
Тој исто така изрази надеж дека односите меѓу Кина и САД ќе се стабилизираат и ќе се вратат на патот на здрав и стабилен развој.
Блинкен рече дека е потребно високо ниво на комуникација за да се избегнат „грешки и конфликти“, пренесува Ројтерс.
Доколку Блинкен отпатува во Пекинг, тоа ќе биде прва посета на американски функционер на Кина во последните пет години.
Во февруари Блинкен го откажа планираното патување во Пекинг поради кинескиот наводно шпионски балон кој леташе над американска територија.
Кинеските власти сè уште не објавиле никакви информации поврзани со посетата, но американски претставник минатиот петок изјави дека државниот секретар треба да биде во Кина на 18 јуни.