„Ние сме сериозно загрижени поради изјави на Путин во врска со нивното можно влијание на регионалната безбедност во опкружувањето на нашата земја“, изјави генералниот секретар на јапонската влада Јошимаса Хајаши, а пренесе јапонската новинска агенција Кјодо.
Путин по разговорите со севернокорејскиот лидер Ким Џонг Ун во Пјонгјанг кажа дека „Русија не исклучува развој на воената и техничката соработка“ со Северна Кореја врз основа на договорот за стратегиско партнерство потпишан во средата, и истакна дека тој договор предвидува и „заемна помош во случај на агресија“ на една од двете земји.
Хајаши кажа дека руската набавка на севернокорејско оружје и неговата употреба во конфликтот во Украина е „јасно кршење на релевантните резолуции на Советот за безбедност на ОН“.
Тој ги критикуваше и изјавите на Путин дека треба да се преиспитаат санкциите на Обединетите нации против Северна Кореја воведени поради нејзината програма за развој на ракетно и нуклеарно оружје.
„Таквите изјави се целосно неприфатливи“, оцени Хајаши.