Шиитските муслимански фракции, од кои голем број се поврзани со Иран, долго време повикуваат на заминување на коалициските сили предводени од САД, по серијата американски воздушни напади против милитантните групи поддржани од Иран, но кои се дел од официјалните безбедносни сили на Ирак.
Воздушните напади, кои дојдоа како одговор на десетици беспилотни и ракетни напади врз американските сили откако Израел ја почна воената операција во Газа, ја загрижија ирачката влада дека нивната земја повторно би можела да стане сцена на регионален конфликт.
„Постои потреба од реорганизирање на нашите односи за да не биде повеќе мета или оправдување за која било страна, домашна или странска, злонамерно да си игра со стабилноста на Ирак и регионот“, рече Судани, додавајќи дека заминувањето на странските сили треба да се договори во духот на „разбирање и дијалог“.
„Да договориме временска рамка за заминување на коалициските сили што ќе биде брзо, за да нема одложување и нападите да не продолжат да се случуваат“, рече шефот на ирачката влада. Според него, само крајот на војната во Газа би го отстранил ризикот од регионална ескалација.
Повлекувањето на САД од Ирак секако би го загрижило Вашингтон поради влијанието на неговиот непријател Иран врз ирачката владејачка клика. По инвазијата на таа земја предводена од САД во 2003 година, проиранските шиитски групи значително се зголемија.
Ирачкиот премиер Судани има ограничена контрола врз некои фракции поддржани од Иран, чија поддршка му беше потребна за да ја освои власта пред една година, и кои формираат моќен блок во неговата владејачка коалиција.
Пентагон во понеделникот објави дека не планира да ги повлече американските војници, кои се во Ирак по покана на ирачката влада. САД имаат 900 војници во Сирија и 2.500 во Ирак како дел од мисијата за која велат дека им помага на локалните сили да го спречат обновувањето на Исламска држава, која во 2014 година зазеде голем дел од двете земји.
Ирак, вториот по големина производител на нафта во ОПЕК, е меѓу најжестоките критичари на израелската војна во Газа, но исто така повторува дека нападите на вооружените групи врз странските сили и дипломатските мисии во Ирак се незаконски и против интересите на земјата. Ирак тврди дека уапсил некои сторители и спречил некои напади.
Истовремено, Багдад ги осуди нападите на САД врз базите на исламистичките групи како сериозно нарушување на неговиот суверенитет. Но критичарите во Ирак истакнуваат дека овие групи, вклучувајќи ги Катаеб Хезболах и Харакет Хезболах ал-Нуџаба, го злоупотребуваат својот статус на членови на Силите за народна мобилизација (ПМФ), т.е. државните безбедносни сили, како параван.
Кога овие групи ги напаѓаат американските сили, тие го прават тоа надвор од командниот синџир и под знамето на Исламскиот отпор во Ирак, а кога САД возвраќаат, тие ги жалат своите загуби како членови на ПМФ.
Судани, сепак, смета дека повеќе нема причина за присуство на странски војници во неговата земја бидејќи Исламска држава беше поразена во 2017 година и дека земјата е способна да се одбрани од тероризмот, но тој е отворен за воспоставување билатерални односи и соработка на полето на безбедноста, вклучувајќи обука и советување на ирачките безбедносни сили и купување оружје.
„САД не се наш непријател, ние не сме во војна со САД, но ако тензиите продолжат, тие сигурно ќе имаат последици и ќе создадат јаз во нашите односи“, рече Судани. Шефот на либански Хезболах, Саид Хасан Насрала, се залага за повлекување на американските сили од Ирак бидејќи, како што рече, тоа ќе го направи американското присуство во Сирија неодржливо.
