понеделник, 22 јули 2024

Индискиот премиер во Русија првпат од почетокот на војната во Украина

Индискиот премиер Нарендра Моди денеска пристигна во дводневна посета на Русија, прва од почетокот на војната во Украина во 2022 година, што доведе до усложнување на односите меѓу двата стари партнери и до зближување на Москва со Кина, главниот геополитички ривал на Индија.

Фото: Пиксабеј

Објавено на

часот

Сподели

Моди последен пат ја посети Русија во 2019 година, при што се сретна со Путин на форум во далекоисточното пристаниште Владивосток. Во септември 2022 година тие зборуваа во Узбекистан на самитот на блокот на Шангајската организација за соработка, но минатата недела Моди не присуствуваше на состанокот на групата во Казахстан.

Читиџ Баџпи, виш научен соработник за Јужна Азија во британскиот институт Чатам хаус, рече дека Индија сѐ повеќе се оддалечува од секој форум каде што Русија и Кина играат значајна улога.

Русија уште од Студената војна има блиски односи со Индија, која е нејзин клучен трговски партнер од пред две години, кога Западот почна да воведува санкции кон Русија.

Кина и Индија се клучни купувачи на руската нафта поради санкциите што ги затворија повеќето западни пазари за рускиот извоз.

Под водство на Моди, Индија избегнува да ја осуди руската воена акција во Украина, истовремено нагласувајќи ја потребата од мирно решение.

Се очекува Моди да се обиде да одржува блиски врски со Русија, важен трговски партнер и главен снабдувач на оружје за Индија.

Откако западните санкции го блокираа извозот на руска нафта од почетокот на руската војна во Украина, Индија стана клучен купувач и сега добива повеќе од 40 отсто од увезената нафта од Русија.

Иако зависи од Русија за воените набавки, а испораките од Москва се намалени поради борбите во Украина, Индија купува повеќе од САД, Израел, Франција и Италија.

„Одбранбената соработка очигледно ќе биде приоритетна област“, ​​рече Баџпи, додавајќи дека 60 отсто од индиската воена опрема и системи се од руско потекло.

Неутралниот став на Индија, која ниту ја осудува ниту ја одобрува војната на Русија против Украина и повикува на разговори за прекин на борбите, ги зајакна напорите на Путин да се спротивстави на, како што ја нарекува, западната доминација во светот.

Тереза ​​Фалон, аналитичарка во Центарот за руски, европски и азиски студии, рече дека посетата на Моди на Русија покажува дека „Путин се обидува да покаже дека не ѝ е вазал на Кина, дека има опции, дека Русија сè уште е голема сила“.

Шефот на евроазискиот центар „Карнеги Русија“ Александар Габујев изјави дека постапките на Путин на светската сцена покажуваат дека тој е „далеку од изолиран“ и дека Русија не треба да се занемари.

Во преговорите меѓу Моди и Путин, значајна ќе биде намерата да се развие поморски коридор меѓу главното индиско пристаниште Ченај и Владивосток, портата на рускиот Далечен Исток.

Трговијата меѓу Индија и Русија се зголеми, достигнувајќи близу 65 милијарди долари во финансиската година 2023-2024, поради силната енергетска соработка, изјави во петокот индискиот министер за надворешни работи Винај Мохан Кватра за новинарите.

Индискиот увоз од Русија достигна 60 милијарди долари, а извозот е само 1 милијарда долари во фискалната 2023-24 година, рече Кватра.

Најголем дел од извозот на Индија во Русија се лекови и други фармацевтски производи, телекомуникациска опрема, железо и челик, поморска опрема и машини.

Увозот на Индија од Русија вклучува сурова нафта и нафтени деривати, јаглен и кокс, бисери, скапоцени и полускапоцени камења, ѓубрива, растително масло, злато и сребро.

ТОП ВЕСТИ

ПОСЛЕДНИ ВЕСТИ