Процената претставува длабинска анализа на работата на локалната самоуправа која дава резиме на вкупните перформанси на локалната самоуправа со патоказ од препораки за унапредување на состојбата. Истражувањето беше спроведено од 1 февруари до 15 мај 2024 година.
Во споредба со 2022 година (27 отсто), во 2024 година просекот на отвореност достигна 37 отсто, што е пораст за 10 проценти во две години. Иако овој процент е видливо зголемен, сепак претставува индикација за ниско ниво на отвореност во работењето на локалната власт во Македонија, со чест на исклучоци кои проактивно и темелно се посветуваат на отвореноста кон граѓаните.
Во 2024 година, наодите од Индексот на отвореност покажаа дека најотворените единици на локална самоуправа се: Битола (67%), Делчево (66%), Демир Хисар (64%), Велес (60%), Валандово (59%), Прилеп (58%), Крива Паланка (58%), Берово (58%), Василево (56%), Кочани (55%), Градско (54%), Гевгелија (54%), Охрид (53%), Кавардарци (52%) и Гази Баба (52%), наспроти најзатворените единици на локална самоуправа меѓу кои се: Сопиште (7%), Кривогаштани (13%), Студеничани (13%), Росоман (14%), Чучер Сандево (15%), Шуто Оризари (16%), Лозово (17%), Боговиње (18%), Ранковце (18%), Врапчиште (19%) и Чаир (19%).
Исто како во 2022 година, во 2024 година единиците на локалната самоуправа имаат највисока просечна оценка во областа транспарентност (46 проценти), а најниска просечна оцена во областа свесност (21 процент), додека најголем напредок се забележува во областите транспарентност и интегритет односно зголемување за 12 отсто.
Овој низок резултат во областа свесност (21 процент) укажува на слабиот квалитет на планирањето, програмирањето, мониторирирањето и евалуацијата на политиките што ги спроведуваат единиците на локалната самоуправа. Јавниот интерес треба да биде отсликан во јавните политики, што го прави овој поразителен резултат уште поалармантен.
