На Бајден му беа потребни 1.968 делегати за да ја добие номинацијата, а таа бројка беше надмината во вторникот вечерта кога почнаа да доаѓаат резултатите од партиските избори во Џорџија, објави Едисон рисрч. Резултатите доаѓаа и од Мисисипи, државата Вашингтон, Северните Маријански Острови и демократите што живеат во странство.
Неколку часа подоцна, Трамп ги освои 1.215-те делегати потребни за да ја обезбеди републиканската претседателска номинација додека партиските избори се одржуваа во четири сојузни држави, вклучително и Џорџија, каде што Трамп се соочува со обвиненија за обид да ги поништи резултатите од изборите во 2020 година. Во вторникот во прашање беа 161 делегат во Џорџија, Хаваи, Мисисипи и државата Вашингтон.
81-годишниот Бајден издаде изјава откако ја доби номинацијата на демократите, напаѓајќи ја, како што ја нарече, „кампањата на огорченост и одмазда на Трамп што ја загрозува самата идеја за Америка“.
„Гласачите сега можат да ја изберат иднината на оваа земја. Дали ќе застанеме и ќе ја браниме нашата демократија или ќе дозволиме другите да ја уништат? Дали ќе го вратиме правото на избор и заштита на нашите слободи или ќе дозволиме екстремистите да ги одземат?“, порача тој.
Исходот од гласањето во вторникот беше практично неизбежен заклучок, откако последниот преостанат соперник на Трамп за републиканската номинација, поранешната амбасадорка во ОН Ники Хејли, ја заврши својата претседателска кампања по доминантниот настап на Трамп минатата недела во супервторникот, кога тој освои мнозинство на прелиминарните избори во 14 од 15 држави.
Во видео објавено на социјалните мрежи, Трамп рече дека нема време да слави и наместо тоа се фокусирал да го победи Бајден, кого го нарече „најлошиот претседател во историјата на САД“.
„Ќе работиме, душо, ќе работиме. Ќе ги затвориме нашите граници. Ќе правиме работи што никој досега не ги видел. И ќе ја направиме економијата на нашата земја најдобра во светот“, рече Трамп.
Во меѓувреме, Бајден се соочи со само симболична опозиција на демократските избори, иако либералните активисти огорчени од неговата поддршка за израелската војна во Газа убедија значително малцинство демократи да гласаат „воздржано“ во знак на протест.
Обајцата веќе го свртеа своето внимание кон изборите на 5 ноември и одржаа ривалски митинзи во Џорџија во саботата.
На митингот во Рим, Џорџија, Трамп (77) ги повтори своите лажни тврдења дека изборите во 2020 година биле „измама“ и ја обвини обвинителката на округот Фултон, Фани Вилис, дека го гони од политички причини. Тој, исто така, го нападна Бајден дека не го сузбил протекот на мигранти преку јужната граница на САД, прашање на кое планира да се фокусира во кампањата, исто како и во 2020 година.
Кампањата на Бајден влезе во поагресивна фаза во петокот, велејќи дека собрале 10 милиони долари во 24 часа по обраќањето на Бајден за состојбата на Унијата, што дополнително ја зголеми финансиската предност на демократите пред републиканците.
Последен пат реприза на избори се одржа во 1956 година, кога републиканскиот претседател Двајт Ајзенхауер по втор пат го победи поранешниот гувернер на Илиноис демократот Адлај Стивенсон.
Оваа година гласачите изразија мал ентузијазам за повторување на жестоките избори во 2020 година, при што анкетите на Ројтерс/Ипсос покажаа дека и Бајден и Трамп не се популарни кај повеќето гласачи.
Безбројните кривични пријави на Трамп – тој се соочува со 91 обвинение за кривично дело во четири одделни обвиненија – може да ја наруши неговата положба меѓу добро образованите гласачи во предградијата чија поддршка тешко ја стекна.
Тој би требало да стане првиот поранешен американски претседател на кој ќе му се суди во Њујорк на 25 март, каде што се соочува со обвинение дека фалсификувал деловни записи за да ги скрие тајните исплати на пари на порноѕвезда.
За најсериозен случај против него нашироко се смета федералното обвинение во градот Вашингтон, кое го товари за заговор да влијае на изборите во 2020 година. но случајот е на чекање откако Врховниот суд се согласи да го сослуша Трамповото тврдење за претседателски имунитет и не е јасно дали може судењето да се одржи пред денот на изборите.
Бајден го мачи перцепцијата кај повеќето гласачи дека е премногу стар за втор четиригодишен мандат, иако сојузниците веруваат дека неговиот жесток говор за состојбата на Унијата може да ја промени таа перцепција.
Економијата, како и секогаш, ќе биде централното прашање на кампањата.
Бајден претседаваше со растечка економија, со намалување на инфлацискиот притисок, а акциите достигнаа највисоки нивоа на сите времиња. Но анкетите покажуваат дека Американците не сакаат да му припишат заслуги на претседателот и дека се фрустрирани од високите цени на артиклите како храната среде пандемијата.
