На свеченото доделување на наградите, што синоќа се одржа традиционално по 28-ми пат, статуетката „Жена водилка“, покрај Георгиева-Јовевска, ја добија и уште девет менаџерки од Македонија и три од Србија и Хрватска.
Oд Стопанската комора велат дека за ова награда и признание Георгиева-Јовевска е препознаена и пофалена како една од водечките жени менаџери во земјата поради нејзиниот придонес во Комората. Во својата 22-годишна кариера, таа извршува клучни позиции во Стопанската комора, како генерален секретар и извршен директор на комората, и шеф на кабинет на претседателот на комората. Преку нејзините управувачки и лидерски вештини, се додава понатаму во соопштението, таа успешно води бројни иницијативи на комората што ги засили позициите на македонските компании и го зајакна коморското вмрежување.
„Георгиева Јовевска во своето обраќање пред присутните најпрво се заблагодари на ‘Марили’ агенцијата, односно на генералниот менаџер Лидија Трипуновска и нејзиниот тим што сите овие години неуморно работат и како единствени во организирање на вакви манифестации ги препознаваат и наградуваат жените менаџерки кои оставиле белег во своето работење. Георгиева Јовевска им честиташе на сите наградени жени од земјата и регионот и истакна дека се чувствува горда што е дел од наградените посебно и поради фактот што до сега таа е прва вработена од комората што добива ваква награда, бидејќи сите изминати години добиваат жени претприемачки кои некои од нив се од фирми членки на комората со кои комората се гордее“, се вели во соопштението.
“Наградата ми претставува и мотив да бидам уште поуспешна во периодот кој доаѓа но истата нека биде и поттик за сите жени и девојки кои упорно работат, не се откажуваат и учат. Клучното оружје на секој човек е знаењето, па затоа никогаш не престанувајте да се едуцирате, бидете самоуверени и самопочитувајте се но почитувајте ги и сите останати околу вас. Неопходен е баланс и огромна поддршка од семејството за постигнување одлични резултати. Често ја користам изреката на Роберт Куок, еден од најбогатите луѓе во Малезија, кој кажува никогаш да не бидеме алчни, да не ги користеме другите, а да ги искористиме сите можности кои ни се нудат. Јас на ова додавам и да бидеме принципиелни, секој нареден ден да бидеме подобри од претходниот, да имаме емпатија кон останатите и сѐ што правиме одејќи кон крајната цел и замисла да го правиме не заради личен интерес туку заради поширока добробит”, рече на доделувањето на наградите Георгиева Јовевска.
Таа потенцира дека е поткрепена со поддршката од претседателот на Стопанската омора, Бранко Азески, како и од, како што рече, прекрасниот професионален тим на вработени во комората, кои сите заедно на чело со претседателот претставуваат не само одлични професионалци, туку пред се добри луѓе со кои е чест и задоволство да се работи.
Покрај Георгиева Јовевска, годинашни лауреатки се и Катерина Бошевска – генерален директор на ЕОS Македонија и EOS Косово, Жанета Бадаровска Ѓорѓиевска – генерален менаџер на Камел 98 – Виница, Евгенија Ѓорѓиеска – извршен менаџер на Ламинати КОМ Доо – Прилеп, Цветанка Илиева – генерален менаџер на Бистро Груп ДОО – Гевгелија, Ирена Јакимова – генерален менаџер на Инспирит Коучинг- Скопје, Клаудија Лутовска – генерален менаџер на Сеттим Консалтинг – Битола, Марија Патриклиска – менаџер за човечки ресурси ЕАМ ДОО – Штип, Маја Наумовска Савеска – директор на корпоративни и маркетинг комуникации во Халкбанк АД – Скопје, Весна Ставрова генерален менаџер на ПЗУ Аптека „Сара Фарм“ – Скопје, Сања Путица – менаџер за односи со јавност и инвеститор во Атлантска пловидба д.д – Хрватска, Дариа Шуриќ – генерален менаџер на DarMell – Хрватска и Зорана Пејчиќ – генерален менаџер и претседател на ИО на Дунав Реосигурување – Србија.
Манифестацијата „Избор на најуспешни жени“ преку Марили Бизнис клубот спојува над 150 жени менаџерки кои соработуваат, се вмрежуваат, организираат хуманитарни настани, но и поттикнуваат млади жени да влезат и да се остварат во бизнис сферата.
