Соборувањето на претседателот Мохамед Базум минатата среда, седмо воено преземање на власта во Западна и Централна Африка за помалку од три години, предизвика шок низ регионот.
Поранешната колонијална сила Франција веќе една деценија има сили во регионот кои помагаат во борбата против исламистичкиот бунт, но некои жители велат дека сакаат поранешниот колонијален владетел да престане да се меша во нивните работи.
Во неделата, приврзаниците на хунтата запалија француски знамиња и ја нападнаа француската амбасада во главниот град на Нигер, Ниамеј, по што полицијата одговори со употреба на солзавец.
„Со оглед на ситуацијата во Нијамеј, насилството врз нашата амбасада и фактот дека воздушниот простор е затворен и нашите граѓани не можат сами да заминат, Франција подготвува евакуација на своите граѓани и (други) европски граѓани кои сакаат да ја напуштат земјата“, се вели во соопштението на Министерството за надворешни работи.
„Евакуацијата ќе започне денеска“, се вели во соопштението. Според веб-страницата на француското Министерство за надворешни работи, во 2022 година во Нигер имало нешто помалку од 1.200 француски државјани.
Италијанскиот министер за надворешни работи денеска најави дека владата ќе организира специјален лет за враќање на италијанските државјани од Ниамеј.
„Италијанската влада одлучи да им понуди на нашите сограѓани во Нијамеј можност да го напуштат градот со специјален лет за Италија“, објави министерот за надворешни работи Антонио Тајани на Твитер.
