Премиерот на Финска, земјата која со Русија има граница долга повеќе од 1.300 километри, на пленарната седница во Стразбур кажа дека руската агресија на Украина е силен потсетник на кревкоста на мирот во Европа, дека таа им се заканува на самите темели на Европската Унија и дека е клучниот предизвик на оваа генерација европско раководство.
„Русија очигледно се подготвува за долг конфликт со Западот“, кажа Орпо, премиерот на финската влада која е најдесна од крајот на Втората светска војна.
„Но, Русија не е непобедлива“, додаде поранешниот министер за внатрешни работи, земјоделство и финансии.
Финска во април стана 31 членка на НАТО, а Орпо истакна дека таа одлука не е донесена лесно, и дека е јасен сигнал на посветеноста на Хелсинки на безбедноста на континентот.
„Војната во Украина беше повик на будење. Не смееме никогаш повеќе да бидеме толку зависни од други за нашата безбедност и енергетика“, оцени тој.
Финскиот премиер кажа и дека Русија ја користи нелегалната миграција во Финска како оружје, испраќајќи државјани на трети земји преку нејзините граници.
„Тие бројки сè уште се релативно ниски, но феноменот е загрижувачки“, кажа Орпо, додавајќи дека тоа би можело да стане закана за националната и европската безбедност.
Тој порача дека ЕУ мора да покаже сила и да ги исполни своите потенцијали во време кога во светот се води борба меѓу демократските и авторитарните тенденции.
