Ердоган ги критикуваше западните земји поради поддршката на Израел, велејќи дека му дале можност на израелскиот премиер Бенјамин Нетанјаху да изврши „дивјачки напади“ врз Појасот Газа поради нивниот „неодлучен став“, пренесува Ројтерс.
„Што и да направи израелското раководство, не може да ја сокрие реалноста дека тоа е убиствена, сурова, криминална, лажлива и фашистичка влада“, рече Ердоган. Тој истакна дека повиците на западните земји за смиреност се бесмислени, додека поддршката за Израел продолжува.
„Сите добро знаеме дека се додека продолжуваат нападите врз Газа и опсадата, количината на помош не е доволна. Најитно е да се зголеми бројот на камиони кои минуваат низ преминот Рафа. Секако, неопходно е да се изврши притисок врз Израел во овој поглед“, рече турскиот претседател.
Минатата недела турската Црвена полумесечина ја испрати најголемата пратка помош во Газа до сега, испраќајќи брод со околу 3.000 тони храна, лекови и хуманитарна опрема.
Турција, која остро го критикуваше Израел поради воената офанзива во Газа и ги поддржа чекорите на израелското раководство да му се суди за геноцид, постојано повикува на прекин на огнот и испрати повеќе од 40.000 тони хуманитарна помош преку Египет.
