Другиот лекар обвинет во случајот, Салвадор Пласенсија, се изјасни за невин, како и Џезвин Санга, за која обвинителите утврдија дека била дилерка позната како „кралица на кетаминот“. На двајцата им е закажано судење во март.
Личниот асистент на Пери, Кенет Ивамаса, кој призна дека му ја вбризгал дрогата на Пери, и посредникот што рече дека го набавил кетаминот од Санга, веќе се изјаснија за виновни.
Обвинителите рекоа дека Пласенсија го купил кетаминот од Чавез, а во пораките до Чавез за сумата што ќе ја побара од Пери за дрогата, тој напишал: „Се прашувам колку ли ќе плати моронов“.
Според судските записи, Пласенсија му го давал кетаминот на Пери и ги обезбедувал дозите што ги инјектирал асистентот.
Пери почина на 54-годишна возраст во октомври 2023 година од кетамин и други фактори, од кои се онесвестил и се удавил во хидромасажна када, според извештајот од обдукцијата во декември 2023 година. Актерот со години зборуваше во јавноста за злоупотребата на дрога дури и додека го играше Чендлер Бинг во популарниот телевизиски ситком „Пријатели“.
Мет Бинингер, адвокатот на Чавез, во август им изјави на новинарите дека неговиот клиент прави сѐ што е во негова моќ да соработува, да помогне во оваа ситуација.
„Многу се кае“, рече Бинингер.
Адвокатот додаде дека каењето на Чавез не е поради тоа што Пери бил славна личност, туку затоа што починал некој што се обидувал да се лекува.
