ДКСК на денешната седница донесе одлука да иницира до Уставниот суд да ја оцени законитоста и колизијата (судир) со други закони на Законот за преземање административни службеници вработени преку К-5 програма во Министерството за политички систем и односи меѓу заедниците, а од Владата да побара извештај за спроведувањето на овој закон со кој институциите треба да прифатат тканаречени рамковни вработени кои нераспределени добиваа плата, а седеа дома.
Не е познато дали законот е сѐ уште во примена и дали се веќе распределени предвидените лица за преземање во државните институции затоа што Министерството за политички систем и односи меѓу заедниците не и одговорило на ДКСК со податоци, а, како што беше посочено, и натаму продолжува да објавува нови огласи.
Во однос на балансерот, ДКСК смета дека иако имало позитивен резултат во вработувањата по етнички клуч, во изминатите години станал евидентен порастот на бројот на вработени без реални потреби и без просторни услови во институциите, а практиката покажала дека кандидатите за да се вработат ја наведуваат етничката припадност што се бара во конкурсот.
Според ДКСК, ваквата примена на оваа алатка, каде што етничката припадност е основен податок за распределба на работно место, се коси со мерит-системот, ја нема вредноста за која била наменета и се злоупотребува доведувајќи до ризици од трговија со влијанија, коруптивно однесување и создавање политички клиенти на партиите.
Од тие причини Антикорупциска смета дека треба да се провери дали балансерот треба да се укине или да се најде можност да се спречи злоупотребата.
