На расправата беа изведени вербални докази, беа сослушани двајцата сопственици и сведок предложен од обвинителството. Две градежни компании од Куманово „УПМ-груп“ и „Хромак Емил“, сметаат дека Димитриевски ја злоупотребил функцијата градоначалник и ги оштетил.
Тие сметаат дека се оштетени бидејќи истиот состав на Советот на општината и градоначалникот изгласале детален урбанистички план (ДУП), во кој сакале да вложат инвеститорите. Според нивното сведочење, подоцна советот на предлог на градоначалникот донел одлука за суспензија на ДУП-от, кој се однесува на парцела во близина на гимназијата и школската амбуланта во Куманово.
Според Бобан Спасовски, сопственик на „УПМ груп“, градоначалникот Димитриевски намерно ја злоупотребил положбата и не дал навремени одобренија за градба, ниту пресметка за плаќање на комуналии. Тој кажа дека ќе побара и отштета, обвинувајќи дека градоначалникот преку администрацијата ја доцнел постапката.
Емил Георгиевски, сопственикот на „Хромак“ рече дека неговата фирма била задолжена за оперативата, а неговиот партнер за административните работи. Двајцата, одговарајќи на прашања на одбраната на обвинетиот кажаа дека е пракса да се склучуваат договори со изведувачи кои требало да извршат активности на градежната парцела пред да почне изградбата и дека се нафатиле да платат аванс со неколку други изведувачи. Според Георгиевски, така прават и сега во други градови и соседни земји. И Георгиевски ќе побара оштета. Двете градежни фирми побаруваат околу 3,3 милиони денари.
Одбраната пак, праша, како пред да добијат дозвола почнале постапки со други компании изведувачи, се нафатиле да платат и аванс, иако дозволата воопшто ја немале и дека одлуката за изградба важела за сите објекти не само за спорниот објект, даден во проектот на фирмите. Спасовски одговори дека е бизнисмен и презема ризици и оти ова било пракса востановена во градежната сфера.
На денешната расправа беше сослушана и раководителката на секторот за комунални дејности од општина Куманово, Лидија Ланг Спасовска, која рече дека за надоместоците законските рокови се куси и дека се потребни потписи од советник, раководител и градоначалник.
Градоначалникот Димитриевски потенцира дека не се чувствува виновен.
Наредната расправа е закажана за 2 јули, кога ќе биде сослушан уште еден сведок од секторот за урбанизам од општина Куманово.