Главниот преговарач на Србија во разговорите со Косово Петар Петковиќ и главниот косовски преговарач Бесник Бислими се сретнаа во вторникот во Брисел во нова рунда преговори на која посредуваше претставникот на Европската Унија Мирослав Лајчак, која заврши без каков било договор.
Соговорниците разговарале за Основниот договор за нормализација на односите, Анексот за негова имплементација, исчезнатите во војната и договорот за енергетика.
Петковиќ на социјалната мрежа Икс денес објави дека Бислими сето тоа „го отфрлил и критикувал“.
Во соопштението за јавност кое Бислими го објави во вторникот се наведува дека српската страна одбила да се вклучи во разговори за одобрување на планот за имплементација и формализација на Основниот договор, врз основа на гаранциите кои биле барани за средбата на лидерите минатата недела.