Пукањето на Трамп „нè повикува сите да направиме чекор назад“, рече Бајден. За среќа, Трамп не е сериозно повреден, рече тој.
„Не можеме да дозволиме ова насилство да се нормализира. Политичката реторика во оваа земја е многу вжештена. Време е да се смири“, рече тој. „Сите имаме одговорност да го направиме тоа“.
„Во Америка несогласувањата ги решаваме на гласачка кутија. Така го правиме тоа. На гласачка кутија. Не со куршуми“, рече Бајден во говорот долг околу седум минути, пренесе Ројтерс.
Ова е трет пат Бајден да коментира на прашања од големо значење за Американците од формално уредената Овална соба, откако тој ја презеде функцијата во 2021 година.
Настапот му овозможи на Бајден да ја покаже моќта на функцијата, што е важна симболична слика додека се бори со некои во сопствената Демократска партија кои сакаат 81-годишниот лидер да се повлече од кандидатурата за реизбор поради загриженоста дека нема ментална острина за уште еден четиригодишен мандат.
Четворица американски претседатели се убиени, а неколку избегнале обиди за убиство. Застрелани се повеќе претседателски кандидати, од кои некои фатално.
„Насилството никогаш не било одговор“, рече Бајден.
Бајден ретко се обраќа од Овалната соба. Минатиот октомври, одржа говор во ударен термин за да ги коментира конфликтите во Газа и Украина, а во јуни 2023 година зборуваше кога беше постигнат договор со републиканците за да се избегне пробивање на горната граница на американскиот долг.
Бајденовата кампањата ги откажа вербалните напади врз поранешниот претседател, за да се фокусира на иднината. Неколку часа по пукањето во саботата, кампањата ги повлече телевизиските реклами и ги прекина другите политички комуникации.
„Вечерва барам од секој Американец повторно да се обврзе“, рече Бајден. „Омразата не смее да има безбедно пристаниште“.
Но, тој рече дека е фер да ја спротивстави својата визија со онаа на поранешниот претседател и дека планира да го стори тоа наскоро.
