Сè уште не се знае кој и зошто го поставил таму. „Засега не е познато како објектот стигнал до локацијата или кој е одговорен за тоа“, соопшти во петокот полицијата во Лас Вегас. Монолитот е висок речиси два метра.
Минатиот викенд во пустината Невада се појави мистериозен монолит. Структурата била забележана од полицијата во Лас Вегас за време на мисија за пребарување и спасување северно од долината Лас Вегас, пишува Си-ен-ен.
„Гледаме многу чудни работи, но погледнете го ова! Како се појави таму?“ соопшти полицијата на социјалните мрежи. Високата, правоаголна, рефлектирачка структура била забележана во близина на Гас Пик, планинарско подрачје во пустината Невада.
Монолитот наликува на други слични мистериозни објекти кои се појавија низ светот во 2020 година. Исто така, има сличности со оној од култниот научно-фантастичен филм 2001: Одисеја во вселената, во режија на Стенли Кјубрик.
Пред околу четири години, слични објекти се појавија на различни места, вклучително и еден во американската пустина Јута. Во ноември 2020 година, бил забележан од пилот на хеликоптер. Отприлика во исто време, еден бил пронајден во Романија, како и еден во Калифорнија и на островот Вајт во Англија.
Уште еден монолит се појави на врвот на еден рид во Велс во март. Очевидци велат дека скулптурата изгледала совршено рамно. Засега не е познато кој ги поставува овие необични објекти.
Монолитот од Јута, за кој се верува дека е првиот во серијата, бил вграден во карпа во област толку оддалечена што властите не ја откриле веднаш неговата локација поради страв дека љубопитните ќе се изгубат обидувајќи се да го најдат.
Меѓутоа, онлајн „детективите“ набрзо ги пронашле координатите на монолитот, а во областа пристигнале орди љубопитни туристи, од кои некои мислеле дека се работи за вонземски објект. „Оваа работа не е надвор од овој свет“, рече поручник Ник Стрит од Одделот за јавна безбедност во Јута во 2020 година.
За да се избегне истата ситуација, властите во четвртокот го отстранија монолитот од Невада кој незаконски бил поставен на државно земјиште. Полицијата соопшти дека предметот сега е на тајна локација. Фотографиите од отстранувањето на монолитот покажуваат голема дупка во земјата и арматура која излегува од објектот.
