Според кинеската војска, американски воен брод навлегол во областа на островите Спратли, приближувајќи се до атолот кој го присвојуваат Кина и Филипините.
Кинеската Народноослободителна војска организира поморски единици за придружба и набљудување на американскиот брод, рече портпарол, истакнувајќи дека кинеската војска е „во висок степен на готовност, подготвена решително да го брани националниот суверенитет“.
Американската морнарица соопшти дека воениот брод Габриел Гифордс рутински спроведува операции во меѓународните води во Јужното Кинеско Море, во согласност со меѓународното право.
„Американската 7 флота спроведува операции во Јужното Кинеско Море секој ден, како и во изминатите децении“, се вели во соопштението. „Овие операции покажуваат дека сме подготвени да поддржиме слободен и отворен индо-пацифички регион“.
Во последните месеци, Кина веќе протестираше против патролирањето на американските воени бродови во Јужното Кинеско Море, а кинеските бродови неколкупати се судрија со филипинските бродови, забележува Ројтерс.
Во неделата, филипинската крајбрежна стража испрати два брода во Јужното Кинеско Море, велејќи дека забележала „загрижувачко“ групирање на кинески воени бродови во близина на спорниот архипелаг.
