Според два од изворите на Агентство, Путин и Абрамович се сретнале на 16 февруари за да разговараат за деталите за планираната размена на затвореници во која бил вклучен Навални, околу четири часа пред затворските власти да известат дека активистот починал.
Изворите на Агентство рекле дека Москва била спремна да го ослободи Навални заедно со новинарот на Волстрит џурнал Еван Гершкович и поранешниот американски маринец Пол Вилан. Во меѓувреме, Германија покажала спремност да го предаде Вадим Красиков, кој отслужува доживотна затворска казна за убиството на чеченско-грузиски бунтовнички командант во Берлин во 2019 година.
Друг извор тврди дека за размена било разговарано и за бизнисменот Владислав Кљушин, кој беше осуден на девет години затвор од федералниот суд на САД минатата година за хакирање и измама со хартии од вредност.
Сојузниците на Навални минатиот месец тврдеа дека активистот бил убиен во последната фаза од разговорите за размена на затвореници меѓу Москва и западните влади. Анонимните западни функционери, цитирани во подоцнежните медиумски извештаи, се разликуваат во процените за тоа колку блиску дошле страните до постигнување договор.
Долгогодишната помошничка на Навални, Марија Певчих, рече дека идејата за размена на Навални за Красиков, висок полковник на Федералната служба за безбедност (ФСБ) потекнала од милијардерот Абрамович.
Абрамович претходно дејствуваше како посредник во неуспешните мировни преговори меѓу Москва и Киев во првите месеци од инвазијата на Украина.
Истражувачкиот новинар Кристо Грозев, кој наводно знаел за плановите за размена на Навални, рекол за Агентство дека Путин „веројатно се согласил“ на размената.
„Мислам дека ова беше или прикривање за план за убиство или стратегиски потег за приближување на преговорите до самиот крај… бидејќи Германија начелно се согласи да го даде Красиков“, рече Грозев, цитиран од медиумот.
Сега кога го нема Навални, вели Грозев, Путин би можел да ја зајакне позицијата на Русија во преговорите и да понуди размена на осудениот полковник на ФСБ за некој од помала важност што се држи во руски затвор.
„Откако дозна дека Западот е подготвен да ѝ го даде Вадим Красиков на Русија, Путин ладно го нареди убиството на Навални“, рекол еден од изворите на Агентство.
