Рускиот претседател Владимир Путин денеска ќе биде домаќин на група африкански лидери кои пристигнаа во Русија во самопрогласена „мировна мисија“, откако тие разговараа за тоа во петокот во Украина.
Претседателите на Коморските Острови, Сенегал, Јужна Африка и Замбија, како и египетскиот премиер и пратениците од Република Конго и Уганда се обидоа во Киев да помогнат да се стави крај на војната што ја започна Русија.
Мисијата во Украина, прва од ваков вид што ја започнаа африканските лидери, доаѓа по другите мировни иницијативи, вклучително и оние на Кина, и има особено значење за Африка, која се потпира на снабдувањето со храна и ѓубрива од Русија и Украина. Војната го попречи извозот на жито од една од најважните житници во светот.
Јужноафриканскиот претседател Сирил Рамафоса изјави за новинарите во петокот по разговорите на африканските лидери со украинскиот претседател Володимир Зеленски дека „овој конфликт има негативно влијание врз Африка“.
„Верувам дека Украинците чувствуваат дека треба да се борат и да не се откажуваат. Патот до мирот е многу тежок и има потреба да се прекине овој конфликт што е можно поскоро“.
Говорејќи на прес-конференцијата во петокот, претседателот на Коморските Острови, Азали Асумани ја изнесе идејата за „патоказ“ кон мирот, што предизвика прашања од претседателот Зеленски, кој побара објаснување и предупреди дека не сака „никакво изненадување“ од нивната посета на Путин.
Шансите за мировни преговори изгледаат мали бидејќи Украина и Русија имаат дијаметрално различни позиции.
Украина бара Русија да ги повлече своите трупи од сите окупирани територии како услов за мировни преговори.
Кремљ, од друга страна, сака Украина да го признае Крим како составен дел на Русија и да ги признае нејзините земјишни придобивки направени во тековната војна.
