Во интервју за британскиот таблоид Сан, Зеленски зборуваше за својот однос со високите команданти, кои ја предводат одбраната против руската инвазија.
Со месеци во политичките кругови на Киев се шпекулира за раздорот меѓу Зеленски и Валери Залужни, врховниот командант на украинските вооружени сили.
Генералот доби пофалби за своите воени кампањи и веќе се смета за ривал на Зеленски за претседателската функција.
Според уставот, редовните претседателски избори би требало да се одржат на 31 март, но Зеленски повика на одложување поради војната што беснее во земјата.
„Ако некој војник одлучи да се занимава со политика, тоа е негово право, но тогаш мора да влезе во политика и не може да се занимава во војна“, изјави Зеленски за Сан.
„Ако управувате со војната имајќи на ум дека утре ќе се занимавате со политика или избори, тогаш во своите изјави и на фронтот се однесувате како политичар, а не како војник, и мислам дека тоа е голема грешка“, продолжи тој.
„Во однос на генералот Залужни и сите команданти кои се на бојното поле, постои апсолутно разбирање за хиерархијата и тоа е тоа, и не може да биде второ, трето, четврто, петто“, додаде украинскиот претседател.
Зеленски, кој секојдневно објавува новости за борбите, се чини дека алудираше на интервјуто што Залужни го даде за Економист претходно овој месец, во кое предупреди дека војната е во застој.
„Нема застој“, му возврати Зеленски.
