Во текот на вчерашниот ден од страна на полициските службеници од сите осум Сектори за внатрешни работи при Министерството за внатрешни работи, а во рамки на континуираните сообраќајни контроли низ патиштата во земјава, биле издадени 864 платни налози и 465 наплатени платни налози на возачи и други учесници во сообраќајот по основ на ЗБСП и Законот за возила (ЗВ).
Како што се наведува во соопштението од МВР, евидентно е дека непочитувањето на брзината на движење и непрописното паркирање се прекршоци со најголем број изречени мерки кон возачите – 262, односно 201. Од друга страна пак, статистичките бројки покажуваат дека откриени биле 67 лица кои што управувале возила без возачки дозволи, потоа следат 49 случаи на некористење сигурносен појас и 36 случаи на зборување со мобилен телефон при управување со возило.
„Исто така детектирани се 21 прекршок кај пешаци, седум лица управувале возило со недозволено ниво на алкохол во крвта а шестмина минале на црвено светло. Поголемиот дел од прекршочните санкции се изречени на подрачјето на СВР Скопје, што е и очекувано со оглед на сообраќајната капацитети и фрекфентност на подрачјето на главниот град“, се додава во соопштението од МВР.
Во текот на минатата година Одделението за превенција при Секторот за внатрешни работи Скопје во делот на превентивното работење во областа на безбедноста на сообраќајот реализираше, најчесто во соработка со Републичкиот совет за безбедност на сообраќајот на патиштата, но и со други локални или невладини институции, над деведесетина едукативно-превентивни активности (кампањи, трибини, работилници), вклучително и дваесетина сообраќајни поуки одржани во полициски станици за возачи, а како нормативно-превентивна мерка согласно Законот за безбедност на сообраќајот на патиштата (ЗБСП). Овие активности што се спроведуваат и во другите сектори за внатрешни работи, заедно со секојдневните интензивирани сообраќајни контроли, се посочува во соопштението, имаат за цел општо подигање на нивното на сообраќајна безбедност во државата.
